Nos ta aki pa yuda tur negoshianten
Kralendijk, 29 di aprel 2020 – Qredits ta un instansia finansiero sosial pa empresarionan. Hustamente durante e temporada di krísis aktual, kaminda empresarionan ta pasando un tempu difísil Qredits ta sostené nan. Banda di yudansa finansiero, esaki den forma di un periodo di grasia adishonal di 6 luna na un interes di 2%, Qredits ta keda inová. Qredits ta ofresé krísis coaching, ‘webinar’ i for di awor klientenan tin e posibilidat di firma nan kontrato digitalmente.
Último simannan Qredits a traha riba un sistema pa por firma kontrato di finansiamentu digitalmente. Pa motibu di e krísis aktual di Corona Vírùs i e medidanan ku ta bini ku esaki, e trayekto di e proyekto pa firma digital a haña un prioridat mas haltu. For di awor ta posibel pa klientenan firma nan kontrato di finansiamentu for di kas. Direktor di Qredits, señor Elwin Groenevelt a indiká ku “Hustamente den e temporada akí, kaminda e islanan ta altamente afektá dor di e medidanan kontra e vírùs di Corona, nos komo instituto finansiero sosial ta opta pa keda presente i ofresé sosten na empresarionan. Pa e rason akí nos a mobilisá personanan adishonal pa por introdusí e programa di firma digital riba e islanan den Caribe tambe. Asina sin kontakto físiko tòg nos por sostené e empresarionan.”
"Asina nos por supporta negoshianten sin kontaktu físiko." aña Elwin Groenevelt, CEO di Qredits
For di temporada di establesimentu di ofisinanan di Qredits riba nos islanan, Qredits ta ofresé coaching grátis na su klientenan. E coachnan akí ta profeshonalnan òf empresario eksperensiá ku riba un base boluntario ta ofresé nan servisionan na Qredits. Komo coach nan por brinda yudansa na e klientenan pa medio di di “brainstorming” i diskushon nan sano pa asina yuda e empresario ku kualke inkietut òf pregunta. Aktualmente e coachnan akí tambe ta disponibel pa krísis coaching. Si bo ta un profeshonal of empresario ku ke bira un Qredits Coach pa aportá na e desaroyo di e klientenan di Qredits, por fabor tuma kontakto ku nos via bonaire@qredits.nl.
Kuminsando e siman aki, for di e ofisina di Kòrsou, ‘webinars’ lo keda ofresé pa empresarionan ku un krédito serka Qredits. Via e seminarionan online aki lo toka diferente tópiko ku ta relevante den e periodo aki, manera: kon pa anda ku atversidat òf kon pa tene bo kabes riba awa finansieramente. Asina aki Qredits ke yuda su klientenan dor di e tempu di krísis aki. E ‘webinars’ nan aki lo ta aksesibel den e periodo aki pa tur kliente di Qredits, pues tin chèns pa wak esaki na Aruba, Boneiru i tambe na e islanan ariba.
Bo ke kuminsá buska konosementu i inspirashon for di awor aki? Qredits ta ofresé un paginá online kaminda preguntanan aktual di empresarionan ta keda tratá. Tópikonan manera: Kon mi ta trata ku klientenan ku no por paga?, Kiko mi tin ku hasi si mi benta baha?, Kon mi por adaptá mi servisionan i keda den bista di klientenan? Tambe 10 tep pa bon kontenido online, òf kon pa haña bo poder mental (bèk) ta para sentral. Na e momentunan akí nos tin e artíkulonan aki solamente na Hulandes, pa e vershonnan tradusí por sigui e paginá di Qredits Bonaire riba Facebook.
Milagros Blanken, Branch Manager di Qredits Boneiru, ta deskribí e situashon aktual pa empresarionan na Boneiru komo: “tristu, desafiante, yen di kambio i kargá ku insertidumbre”. Pa e motibu aki Qredits ta konsehá pa keda den kontakto ku e konseheronan di Qredits na Boneiru. Paso den e tempunan insigur aki, Qredits ta sigui demostrá di ta un dunadó di krédito sosial i inovativo.
Bai na un konversashon of pidi konseho pa pasa e krísis bon.
