Kolabó ashon pa desaroyo di sektor agríkola
Kralendijk, 17 di mei 2023 – Durante di un rueda di prensa ku a tuma lugá dia 16 di mei último Qredits i Entidat Públiko Boneiru (OLB) a introdusí ofisialmente un fiansa nobo yamá ‘Agrilening’. Esaki a tuma lugá na LVV den presensia di Diputado Craane, Diputado Kroon, Diputado Thielman, e tim di Qredits Boneiru, diferente (futuro) kunukero i representatenan di medionan di komunikashon. E meta di e fiansa aki ta pa stimulá aktividat empresarial den e sektor agrario na Boneiru ku lo kontribuí na mas produkshon di entre otro fruta, bèrdura i karni lokal. Tambe lo ehekutá e programa ‘AGRI Business Academy’ pa plantadónan di fruta i bèrdura ku ke hasi di nan hòbi un negoshi.
Un di e prioridatnan di Kolegio Ehekutivo ta pa promové aktividat agrario sostenibel, disponibilidat kontinuo di bèrdura, fruta i karni lokalmente, i redusí dependensia riba importashon di produktonan di konsumo no prosesá. Esaki sin lubidá e kuponan di trabou ku por keda kreá dor di desorayá e sektor agrario. Un insentivo ku a keda krea dor di Entidat Públiko Boneiru e ultimo añanan ta e disponibilidat di parsela riba tereno di LVV pa empresarionan ku ke planta bèrdura i/òf fruta i kria bestia pa konsumo. Tambe tin un programa yamá ‘Simia pa Produkto’ kaminda a designá varios coach pa yuda empresarionan skibi nan plan di negoshi. E gastunan di trèktòr pa plug e tereno di agrikultura via di LVV ta keda parsialmente kubrí dor di OLB i tambe nan a pone fondonan disponibel pa stimulá e merkado di agrikultura.
Ku e ‘agrilening’ ta surgi un espasio finansiero èkstra pa ekspanshon i sostenibilidat di empresanan agrario eksistente i un posibilidat pa un bon komienso pa empresanan nobo di den e sektor. Un aporte konstruktivo na e sektor agraro, diversifikashon ekonómiko i produkshon lokal di kuminda na nos isla. Banda di esaki gobiernu lo sigui buska mas oportunidatnan di subsidio ku por keda aloká pa desaroyo di e sektor aki.” - Hennyson Thielman, Diputado
E ‘Agrilening’ por keda uzá pa finansiá kapital operashonal i/òf otro invershon nan klave pa realisá aktividatnan agrario manera agrikultura, krio di bestia, prosesamentu di e produkto agrario i servisionan ku lo kontribuí na e éksito di e aktividat agrario. E fiansa ta pa personanan ku ke kombertí e aktividatnan agrario aki di un hòbi pa negoshi òf empresarionan eksistente den e sektor ku ke tuma e siguiente stap den nan negoshi. E montante máksimo ku por keda suministrá ta $100.000,- i un interes di 2% lo keda apliká. E término máksimo di e fiansa aki ta 60 luna i adishonalmente por haña 6 òf 12 lunanan (máksimo) di periodo di grasia durante di kaul pago di interes so ta rekerí.
Segun Milagros Blanken, Branch Manager di Qredits na Boneiru, “ku e fiansa aki Qredits no solamente ke duna un impulso na e sektor agrario i aportá na seguridat di suministro di kuminda produsí lokal, pero ke aportá na sostenibilidat di e sektor na Boneiru.”
Kombiná ku e ‘agrilening’ tambe lo ehekutá un programa di edukashon yamá ‘AGRI Business Academy’. Esaki ta un variante di e ‘Small Business Academy’ di Qredits, dirigí riba personanan ku ta hasi aktividatnan di agrikultura komo hòbi i ke kuminsá prepará nan mes pa por hasi di nan hòbi un negoshi. E programa lo dura entre 10 pa 12 siman, i pa siman lo tin 2 a 3 seshon. Lo atendétópikonan relashoná ku e aspekto tékniko di plantamentu i tambe e parti di hasi negoshi komo agrikultor. E gastunan pa partisipá ta US $50, i lo risibí un buki di referensia pa ku tópikonan empresarial, akseso na e lesnan i un ‘e-learning’ ku al final lo generá un plan di negoshi i plan finansiero. Komo tarea final kada kursista lo presentá nan plan di negoshi via di un ‘pitch’ i lo risibí nan sertifikado.
Na final di e rueda di prensá Qredits a anunsiá ku e promé ‘Agrilening’ a keda otorgá na señor Eric Curiel, i huntu ku e diputadonan presente a otorgele un chèk simbóliko. Eric a kuminsá ku krio di kabritu pa produkshon di karni komo hòbi i mirando ku e hòbi a bira algu hopi serio ela disidí den 2022 di dal e stap pa hasi esaki su negoshi bou di e nòmber Queen Clarita Quality Food Products E.Z. Eric a keda asigná un pida tereno na LVV pa ehekutá su aktividat agrario, i lo risibí sosten adishonal di gobiernu pa instalá un stal modèrno pa e krio di su kabritunanan. Eric su mishon ta pa ‘brand’ e karni di kabritu Boneriano dor di no solamente distribuí tur parti di e kabritu na un kalidat haltu lokalmente, pero tambe pa eksportá esaki den region Karibense. E ke logra esaki entre otro dor di traha huntu ku otro kriadonan di kabritu.
Danki na e ‘Agrilening’ empresarionan (potenshal) den e sektor agrario riba Boneiru por risibí yudansa pa medio di finansiamentu. Banda di esaki nan komo kliente di Qredits por hasi uzo grátis di un Qredits Coach pa risibí guia pa desafíonan durante di ehekushon di plan di negoshi i partisipá na training nan ku Qredits ta organisá pa su klientenan. Dor di ofresé mas ku djis fiansa Qredits ke stimulá e empresarionan pa saka lo máksimo di nan mes i nan negoshi.
