Ahora tambe pa empresario nobo.
Kralendijk 4 di yüni 2021 – Qredits lo bolbe risibí un fiansa di 70 mion euro serka Ministerio di Asuntunan Ekonómiko i Klima (EZK). Ku esaki Qredits, e finansiadó sin meta lukrativo, por otorgá krédito transitorio na empresarionan ku a inisiá ku nan negoshi den e promé mitar di aña 2020. E krédito ta un adishon na e medidanan anterior ku Qredits, huntu ku e ministerio i Entidat Públiko di Boneiru a implementá komo parti di nan pakete di sosten pa empresarionan. Qredits, komo finansiadó sosial, lo ehekutá e areglo nobo aki tantu na Hulnda komo na islanan BES.
Empresarionan ku a inisiá ku nan negoshi den e promé mitar di aña 2020, no por hasi bon uzo di e medidanan di sosten eksistente. Pa e motibu aki Qredits ke ofresé e empresarionan aki perspektiva nobo pa medio di e krédito transitorio aki.
E “Corona-overbruggingskrediet voor Starters” ta solamente pa empresarionan ku a inisiá entre yanüari i yüni 2020. Bo mester a regsitrá bo empresa tambe durante e periodo aki na Kamará di Komèrsio i Industria Boneiru. E empresarionan nobo aki por aserká Qredits pa un krédito transitorio di máximo $ 40.000. E término di e krédito ta máximo 72 luna di kual e empresario no mester hasi pago di amortisashon durante di e promé 12 lunanan. Lo apliká un interes di solamente 1,75% durante henter e término di e fiansa i e empresario por likidá e fiansa sin but.
‘Mi tin konfiansa ku e ekonomia di Boneiru ta bai rekuperá rapido bèk. Den e temporada difisil aki ta hopi importante pa sostené negoshi nan i tambe pa mantené kuponan di trabou. E krédito transitorio di Qredits pa empresarionan nobo sigur lo aportá na e pronto rekuperashon di e ekonomía di Boneiru.’, Diputado Hennyson Thielman ta indiká.
Tin 30 mion euro – di e 70 mion euro – disponibel pa finansiá otro empresarionan ku tambe a sufri e konsekuensianan di e krísis di corona. Esaki ta enserá un kontinuashon di e “corona-overbruggingskrediet” ku a keda introdusí den mei di aña 2020 pa empresarionan ku tabata operashonal promé ku mart di aña 2019. Entidat Públiko di Boneiru (OLB) a duna un aporte finansiero di $ 120.000 den 2020 pa ku e krédito aki. Ku e fondonan nobo hasí disponibel dor di EZK, Qredits por sigui duna sosten na e grupo di empresarionan ariba menshoná.
Tambe por konsiderá e kondishon nan di e mikrokrédito aki komo faborabel. E fiansa aki ta trata di un krédito di máximo $ 25.000,- pa empresarionan eksistente. E término di e fiansa aki ta máximo 48 luna di kual e promé 6 lunanan no ta rekerí pago di amortisashon. E periodo di grasia aki por, kaminda ta nesesario, keda pronlongá te ku 12 luna. Den e promé aña di e término di e fiansa e empresario ta paga 2% di interes i despues un interes di 6,75%. Importante ta ku despues di e promé aña, e empresario por likidá e fiansa na kualke momentu sin but.
Ku ayudo di Ministerio di Asuntunan Ekonómiko i Klima (EZK) Qredits por a ofresé èkstra sosten na su klientenan for di inisio di e krísis di corona den mart di aña 2020. Tur empresario ku tabatin un krédito serka Qredits por a pidi un periodo di grasia di 6 pa 12 luna. Durante e periodo aki e kliente a paga solamente 2% di interes. Di e manera aki e empresario no solamente a risibí dispensashon temporalmente di e pago di amortisashon, pero tambe por a paga hopi ménos na interes. Asinaki e empresario a haña gran sosten pa transitá e periodo difisil. Pa esaki, Ministerio di Asuntunan Ekonómiko i Klima (EZK) a hasi 6 mion euro disponibel kaminda 6000 empresario (na Hulanda i Karibe) por a risibí ayudo. Mas ku 55% di e klientenan di Qredits na Boneiru a hasi uzo di e areglo aki.
