Mueblé ku konsenshi riba medio ambiente
For di un edat yòn Peter Schoemaker (34) tabata traha ku plaser huntu ku su tata. Peter semper tabata tin wowo pa detaye i e ta gusta traha hasiendo uzo di su man nan. Pa e motibu aki el a skohe pa e estudio di ‘ Hout- en Meubelmakers’ na Amsterdam pa asina e desaroyá su mes den un artesano.
Durante su estudio Peter tabata traha i drecha mueble komo hòbi. Despues ku el a muda pa Boneiru den 2018, Peter a tuma e desishon pa kombertí su hòbi den un empresa huntu ku su pareha Ninoska Perez Acevedo i asina PS Furniture a keda establesé.
PS Furniture ta speshalisá den e diseñamentu i trahamentu di mueble i arte dor di reusá tur tipo di palunan ku entre otro nan ta kolektá riba bichnan di Boneiru. PS Furniture ta un organisashon ku ta pone èxtra atenshon na nos medio ambiente i asina e ta kontribuí na un sosiedat sostenible. Peter i Ninoska ta spera ku mas empresario ta sigui nan ehèmpel i skohe pa pone mas atenshon na nos medio ambiente.
Peter i Ninoska ta spera ku mas empresario lo sigui nan ejemplar i tuma e desishon di bai empronde ku mas konsenshi riba medio ambiente.
Huntu nan ta un tim fuerte i nan ta komplementá otro hopi bon. Peter ta traha e artenan di palu i Ninoska ku ta un diseñadora di interior ta hasi merkadeo i atministrashon pa e empresa. E fiansa lo keda uzá pa kumpra materialnan profeshonal i tambe pa krea nan ‘website’ pa asina nan ofresé nan mueblenan online tambe. E ‘BES-Cultuurlening’ ta spesial pa empresarionan ku ta aktivo den e sektor kultural i kreativo na Boneiru, St. Eustatius i Saba. E ‘Cultuurlening’ ta pa kapital operashonal i/òf invershon i e ta un inisiativa di ‘Cultuur+Ondernemen’ den kolaborashon ku Ministerio di Enseñansa, Kultura i Sensia den kuadro di maneho di desaroyo di talento (‘Talentontwikkelingsbeleid’). Empresarionan tin e oportunidat pa risibí coaching banda di e fiansa.
Pa mas informashon tokante e ‘BES-Cultuurlening, empresarionan di e sektor kultural i kreativo riba islanan Karibe Hulandes por tuma kontakto ku Qredits Boneiru via bonaire@qredits.nl òf +599 717-1412.
